Hvað er strákurinn eiginlega gamall?

Á vef lögreglunnar segir:

Á föstudag fékk lögregla tilkynningu um að á Stokkseyri væri á ferð um götur ungur drengur á fjórhjóli og hefði legið við slysi af akstri hans.  Við nánari athugun kom í ljós að þarna hafði verið á ferð 13 ára drengur.  Foreldrum drengsins var gerð grein fyrir þeim reglum sem gilda um réttindi og akstur fjórjóla.  Drengurinn er ósakhæfur og verður því ekki gerð refsing fyrir brotið en mál hans verður sent barnaverndaryfirvöldum til meðhöndlunar. 

Hinir virtu vefmiðlar visir.is og mbl.is hljóta að vita betur en lögreglan og segja piltinn 10 ára.  En fyrri athugasemdir við þessa frétt benda reyndar til annars - að hann sé 13 ára.  Visir.is birtir mynd frá Eyrarbakka en mbl.is birtir mynd af stóru fjórhjóli til að komast frá þeirri skömm að birta mynd af "vitlausu" þorpi!

10 ára drengur á fjórhjóli

Þeir á Vísir.is kunna ekki muninn á Stokkseyri og Eyrarbakka

 Þessi frétt er  á visir.is.

Vísir, 18. feb. 2008 11:17

Tíu ára á fjórhjóli á götum Stokkseyrar

Frá Stokkseyri. MYND/365

Lögreglan á Selfossi hafði afskipti af óvenju ungum ökumanni á Stokkseyri á föstudag en þar fór hann um göturnar á fjórhjóli.

Vegfarendur tilkynntu um að legið hefði við slysi af akstri hans. Við nánari athugun kom í ljós að þarna hafði verið á ferð 10 ára drengur. Foreldrum drengsins var gerð grein fyrir þeim reglum sem gilda um réttindi og akstur fjórjóla.

Drengurinn er ósakhæfur og verður því ekki gerð refsing fyrir brotið en mál hans verður sent barnaverndaryfirvöldum.

Eins og allir eiga að veta þá er ljósmyndin sem fylgir fréttinni frá Eyrarbakka. Nú  veit ég ekki hvort fréttin eigi við um textann eða um myndina.  Hvort krakkinn var á ferð hjá Stígshúsi á Eyrarbakka eða á Stokkseyri.

Viðbót kl. 18.40: Um kl. 16,30 var skipt um mynd á fréttinni hjá visir.is. Í stað ljósmyndar frá Eyrarbakka sem sýndi Stíghús og SKjaldbreið ásamt hinni einu og sönnu Götu á Eyrarbakka var komin nærmynd án bakgrunns af lögreglubifreið. Því miður hafði ég ekki haft vit á því að ýta á Print Screen takkann á tölvunni til að varðveita þessi skemmtilegu mistök ágætra blaðamanna visir.is kv. Lýður

Sagan endurtekur sig

Ég skil ekkert í þessu havaríi yfir Vilhjálmi Þorn.  Hann hefur áratugareynslu í pólitík og var í heil tólf ár formaður Sambands ísl sveitarfélaga sem sýnir hversu mikils trausts hann nýtur meðal  sveitastjórnarmanna.  Hann átti fyllilega skilið að verða borgarstjóri 2006 og stóð sig alla tíð afskaplega vel í því starfi. Og hann kemur vonandi aftur.

það sem er að fara með glæstan stjórnmálaferil Vilhjálms er að mínu mati hið mikla offors og ákafi viðskiptajöfra að komast í samstarf við OR-gullkálfinn.   Sömuleiðis hafa íslenskir fjölmiðlar þá áráttu að leggja einstaklinga í einelti  og herja á einstaklinga sem gefa á sér höggstað og standa í varnarbaráttu á fleiri en einum stað.  Að blanda saman opinberum rekstri og einkarekstri getur verið vandasamt og greinilegt að ýmsir stóðu beggja megin samningaborðsins í haust - en ekki þó Villi - en vinir hans ýmsir og nánir samstarfsmenn því miður.

Eru allir búnir að gleyma afsögn Guðmundar Árna Stefánssonar um 1990? Herferð fjölmiðla sem undir öruggri bakstjórn formanns flokks sem ekki er lengur til réðust af miklu oforsi að Guðmundi Árna Stefánssyni ráðherra? Vegna mála sem komu hans ferli í ráðherrastól ekkert við?  Þá var sömu aðferðum beitt,  fjaðrir urðu að hænum og svo framvegis, efnisatriði meintra spillingaratriða endurtekin og endurtekin, GÁS sagður í pólitískri veikri stöðu og að lokum sagði Guðmundur Árni af sér.  Stöð 2 gekk harðast í orrahríðinni gegn ráðherranum, ráðherrann í óvægnum yfirheyrslum og Jón Baldvin tónaði undir á milli.  Mágur Guðmundar Árna, Heimir Karlsson,  hætti störfum á Stöð 2 í kjölfarið. Sagði upp.  Nú um þessar mundir ganga fjölmiðlar með bláa ríkisfjölmiðilinn í farabroddi  hart gagnvart Vilhjálmi þannig að félagar hans í borgarstjórninni neyðast til að ganga út um bakdyr og láta sem Villi sé einn í heiminum.  Og ein skeleggasta fjölmiðlakona landsins, dóttir Vilhjálms, segir upp í Kastljósi. Sagan endurtekur sig. 

Ef ég er orðinn á þreyttur á einhverju ástandi þá er það hið lága plan íslenskra fjölmiðla. Að gera mistök í hólmgöngu getur þýtt dauða.  Að mismæla sig í Kastljósi getur líka þýtt endalok stjórnmálaferils.  Einhvernveginn finnst mér aukaatriðin vera orðin að aðalatriðum í þessum höfuðborgarstjórnarfarsa. Aðalatriðið er það að engin stjórnmálahreyfing fékk hreinan meirihluta í borgarstjórnarkosningunum 2006.  Sömuleiðis árið 1978 fékk engin stjórnmálahreyfing hreinan meirihluta í borgarstjórnarkosningunum.   Í hönd fóru fjögur glundroðaár - eins og þessi fjögur ár eiga eftir að verða  allt til vorsins 2010. Sagan endurtekur sig.

Undir Vilhjálmi komið hver verður næsti borgarstjóri

Flytjum á Jótlandsheiðar!

Í morgun fékk ég símtal frá Steina vini mínum sem nú býr í Kollund á Jótlandi, rétt hjá Flensborg í Þýskalandi.  Í okkar langa símtali kom meðal annars fram að Steini fer nú brátt að huga að fyrsta slætti. Farið er að grænka í Kollund og hann gat lýst veðrinu svo að þar væri komið vor. Hann sat út á veröndinni heima hjá sér þegar hann talaði við mig.  Við rifjuðum upp nokkra hressilega íslenska vetra, m.a. veturinn 1999-2000 og janúar til febrúar 1991. Þá gustaði vel um okkar kalda sker.

Ég gæti alveg hugsað mér að flytja á Jótlandsheiðar.  Það var svosem ekki vitlaus hugmynd þarna fyrir nokkrum öldum síðan hjá dönskmenntuðu embættismönnunum okkar að flytja þjóðina alla á hlýrri slóðir. Nú þarf ekki ráðgjöf embættismanna. Í dag höfum við val og ekkert sem heftir okkur annað en heimabakaðar skuldir og ósýnileg bönd sem kallast ættjarðarást.

Versta óveðrið í vetur

Óvænt ánægja!

Þessi mynd var tekin á þorrablótinu á Eyrarbakka síðasta laugardagskvöld. Skemmtinefnd var með langan og skemmtilegan leikþátt um mannlífið á Eyrarbakka.  Þarna eru Ragna Kristín Jónsdóttir í hlutverki Rauðhettu en Hafþór Oddur Jóhannesson í hlutverki Lýðs Pálssonar safnstjóra sem verður á hennar leið. Sjá nánar á www.eyrarbakki.is

  

Hinn nýji Gúttóslagur?

Ótrúlegt að horfa á þessi ósköp í Sjónvarpinu.  Ég hef ekki séð svona læti í íslenski pólitík áður.  Reyndar létu ýmsir sjálfstæðismenn í Árborg ófriðlega á bæjarstjórnarfundi einum í desember 2006 þegar nýr meirihluti var myndaður. En varla svona.

Hávær mótmæli í Ráðhúsinu

Lék fangavörð

Ég hef séð tvær myndir með Ledger.  Í annari þeirra Monsters Ball átti hann stórleik, reyndar í litlu hlutverki. Hann lék ungan fangavörð sem bugaðist við störf á dauðadeild. Eftirminnilegt.  En ég man ekki hvað hin myndin hét, jú Bræðurnir Grimm. Og etv. hef ég líka séð A Knights Tale  - og jú og hvað lék hann í Casanova líka?  Þær eru þá fjórar bíómyndirnar sem ég hef séð hann leika í eftir allt saman. Brokeback Mountain á ég eftir að sjá. 

Ledger virðist hafa látist af slysförum

Björn Ingi mun koma aftur

Fyrr eða síðar mun Björn Ingi Hrafnsson stíga inn í stjórnmálin aftur.  Enginn skal afskrifa hann þrátt fyrir þessa orrahríð nú um þessar mundir.

Framsóknarmenn slíðri sverðin

Söfn í Skotlandi

Dagana 18. til 25. sept. sl. dvaldi ég í Skotlandi. Fyrst með íslenskum safnamönnum í hinum svonefnda farskóla safnamanna sem starfræktur hefur verið frá 1988 á hinum ýmsustu stöðum á Íslandi - að þessu sinni þó utan skersins og flogið til Skotlands. Að farskóla loknum dagana 21.til25. dvaldi ég ásamt Gurru minni í Roslyn þorpi mjög vinalegu fyrir utan Edinborg. 

Með safnamönnum fræddist ég um starfsemi safna í borgunum Edinborg og Glasgow.  Hin fróðlegasta ferð.  Og ósköp eru nú íslensk söfn lítil miðað við  það sem sjá mátti í Skotlandi.  Allt miklu eldra og stærra í sniðum. Ýmsar hugmyndir fæddust í þessari ferð sem eflaust má vænta að muni sjást í starfsemi íslenskra safna í framtíðinni.  Söfn í Skotlandi gegna mjög mikilvægu samfélagshlutverki og eru ekki bara stofnanir sem safna, rannsaka, varðveita og sýna. Þau hrærast líka mjög mikið í því samfélagi sem þau lifa í.  

Athyglisverðasta safnið sem ég sá í ferðinni var í miðborg Glasgow, safn sem Hörður á Akureyri fann fyrir tilviljun og tókst að draga eins og þriðjung farskólanemenda með sér í skoðunarferð. Safnið heitir Reflex Museum.  Það fjallar um ákveðið fjölmenningarlegt fyrirbæri sem tröllreið öllum heiminum á árunum 1980 til ca. 1990. Höfðar til listgeirans, nánar tiltekið tónlistar.   Í safninu er spiluð úr háværum glymskröttum tónlist sem tilheyrir þessari menningu.  Veggir safnsins eru þakktir frægum einstaklingum sem þekktir voru fyrir að semja og flytja þessa tilteknu tónlist. Má þar nefna A. Ridgelay og G. Michael.  Á skjám mátti sjá hljómsveitir og listamenn sem viðurværi höfðu af þessari list. Sérstakir staðir voru hannaðir og stofnsettir víða um hinn vestræna heim til að spila þessa tilteknu tónlist og voru þar innréttuð sérstök dansgólf  til að dansa undir þessari tilteknu tónlist. Sérstök lýsing einkennir þetta fyrirbæri og kringlóttar glerkúlur snúast iðulega fyrir ofan dansiðkendur. Lýsingin er reyndar mjög óvenjuleg af söfnum að vera, ljós sem blikka í öllum litum og snúast til og frá.  Var því stundum erfitt að lesa hina fáu sýningatexta sem nær eingöngu voru heiti hljómlistarmanna þeirra sem iðkuðu þessa tónlist.  Gjarnan eru barir á þessum tilteknum stöðum sem á alþjóðamáli kallast discoteque.  Reflex Museum er endurgerð slíks staðar að mér virðist sem útskýrir hið sérstaka layout safnsins.  Ég er reyndar ekki alveg viss um að þetta hafi í raun verið safn. Var þetta safn?  Meðfylgjandi myndir sýna mig í vettvangsferðinni á Reflex Museum í Glasgow.

Meira skemmtilegt frá Skotlandsferðinni síðar.

  

Err eða ekki err?

Nú er ég í vandræðum.  Það er orðið "heimildarmynd" eða heimildamynd".  Er err eða er ekki err? Það er stóra spurningin.

Á heimasíðu Kvikmyndamiðstöðvar Íslands titlar Laufey frænka Pál Baldvin sem ráðgjafa heimildamynda - ekki með erri.

Í Mogganum er talað um heimildarmynd með erri í ritdómi eftir Snæbjörn Valdimarsson gagnrýnanda. 

Í íslenskri orðabók er talað um heimildarkvikmynd og heimildarmann með erri.

Ef slegið er inn orðið heimildamynd err-laust á leit.is koma fram 2.261 niðurstöður en þegar á sömu slóð er slegið inn orðið heimildarmynd með erri koma fram 6.622 niðurstöður.

Ég leitaði eftir ráðleggingum Ásmundar Sverris míns gamla íslenskukennara, sem reyndar vill núna gefa íslenska stafsetningu frjálsa! Hann segir að úr því ég sé að fara nota orðið í opinberru plaggi skuli ég þessvegna stafa þetta títtnefnda orð með erri - sem er málvenjan. 

Heimildarmynd verður það heillin mín! Þar hafið þið það kæru lesendur!