Flytjum á Jótlandsheiðar!

Í morgun fékk ég símtal frá Steina vini mínum sem nú býr í Kollund á Jótlandi, rétt hjá Flensborg í Þýskalandi.  Í okkar langa símtali kom meðal annars fram að Steini fer nú brátt að huga að fyrsta slætti. Farið er að grænka í Kollund og hann gat lýst veðrinu svo að þar væri komið vor. Hann sat út á veröndinni heima hjá sér þegar hann talaði við mig.  Við rifjuðum upp nokkra hressilega íslenska vetra, m.a. veturinn 1999-2000 og janúar til febrúar 1991. Þá gustaði vel um okkar kalda sker.

Ég gæti alveg hugsað mér að flytja á Jótlandsheiðar.  Það var svosem ekki vitlaus hugmynd þarna fyrir nokkrum öldum síðan hjá dönskmenntuðu embættismönnunum okkar að flytja þjóðina alla á hlýrri slóðir. Nú þarf ekki ráðgjöf embættismanna. Í dag höfum við val og ekkert sem heftir okkur annað en heimabakaðar skuldir og ósýnileg bönd sem kallast ættjarðarást.

Versta óveðrið í vetur

Athugasemdir

[Hulda Brynjólfsdóttir, 10.2.2008 kl. 10:02]

...já og þessi hressilegi gustur í hárið þegar það blæs svona skemmtilega að norðan...

[Sædís Ósk Harðardóttir, 11.2.2008 kl. 23:56]

já þú manst þá vonandi að pikka í nágrannana líka ef þið flytjið, ég er sko til í að flytja úr þessum veðraham

[Óðinn af Eyrarbakka, 12.2.2008 kl. 13:54]

Ætlarðu þá að taka Húsið með þér? þeir skiluðu okkur jú handritunum!