Það snjóar

Í dag snjóar á réttláta sem rangláta, fátæka sem ríka. Hlutafjáreigendur sem skuldaeigendur. 

Rannsóknin hefur forgang

Er gamli skólinn minn að verða að stórveldi í íslenskum körfuknattleik?

Það eru 22 ár síðan ég lauk námi við Fjölbrautaskóla Suðurlands á Selfossi.  Þá var jú lítillega stundaður körfubolti við skólann og man ég eftir að skólafélagi minn Sveinn Helgason  - sem er ekkert sérstaklega hávaxinn eða minni en 184,5 sm - var í fararbroddi þeirra sem stunduðu körfubolta á Selfossi í þá tíð. 

það kemur mér því reglulega á óvart að nú skuli skólinn minn gamli og góði reka heilt körfuboltalið í úrvalsdeild Íslandsmótsins í þessari grein. Og þeir leggja eitt stórliðið af Suðurnesjum af velli í sínum fyrsta leik!  Vel af sér vikið Örlygur!

Stórsigur FSu gegn Njarðvík

Mótsagnir

Við eigum semsagt von á aðstoð alþjóðasamfélagsins og einnig að borga allar skuldir sem útrásarhetjurnar stofnuðu til.  Af hverju fékk þjóðin ekki að kjósa um EES samninginn á sínum tíma?

Ísland standi við alþjóðlegar skuldbindingar

Þegar Eyjólfur glímdi við blámanninn

Hér í Flóanum er allkunn sagan um hann Eyjólf sem fæddur var á 18. öld einhversstaðar í Stokkseyrarhreppi hinum forna og var heljarmenni að burðum og sterkur mjög. Hann reisti við stóra hraunhellu sem sést enn við Eyrarbakkaveg  og er ekkert langt frá Litla-Hrauni. Eitt vorið kom kaupmaður einn með blámann með sér.  Hann var líka heljarmenni.  Kaupmaður skoraði á  bændurna og sjómennina að leggja blámanninn. Enginn þorði nema Eyjólfur þessi. Svo fór að Eyjólfur vann.  Ég las þessa frásögn í bók eftir dr. Guðna Jónsson og gefur hann það í skyn að einn af afkomendum Eyjólfs hafi verið barnabarnið Halldóra Guðmundsdóttir húsfreyja í Litlu-Sandvík kona Brynjólfs Björnssonar vefara og langalangalangalangai og -amma mín. 

Nú þegar ég blogga þessa færslu þá hef ég ekki bók Guðna við hendina og ekki hef ég enn fengið það staðfest t.d. í Íslendingabók.is hvort það geti verið að ég sé útaf Eyjólfi þessum kominn þar sem islendingabok.is getur ekki um framættir Halldóru í Litlu-Sandvík.  Etv. er einhver ónákvæmni í þessum texta mínum og mun ég gjarnan leiðrétta ef villur koma í ljós. Og að sjálfsögðu tek ég öllum upplýsingum fengins hendi.

Síðustu sjónvarpskappræðurnar

Páll Lýðsson, Guðni og Pútín

Það kemur mér skemmtilega á óvart að Pútín skuli eiga sama afmælisdag og faðir minn sálugi Páll Lýðsson. Fyrir 22 árum síðan flutti Guðni Ágústsson föður mínum snilldarræðu í fimmtugsafmæli pabba.

Í dag komum við systkinin saman í Litlu-Sandvík og drukkum kaffi hjá mömmu - líka vegna þess að fyrir fimmtíu árum voru foreldrar okkar gefin saman af sr. Jóni Þorvarðarsyni.

Guðni og Pútín

Rétt stöðumat er gulls ígildi

Nú er svo komið að ég veit ekki í hvorn fótinn skal stíga. En Geir Hilmar Haarde talaði mjög skýr til þjóðarinnar í dag.  Nefnilega nú er alþjóðleg peningakreppa.  Hér á landi eru til risastórir bankar sem vaxnir eru íslensku hagkerfi yfir höfuð.  Væntanlega rétt stöðumat. Þetta reddast, núna, bráðum, seinna eða síðar.

Ég má reyndar ekkert vera að því að pæla í þessum hlutum, á föstudaginn var seldi ég húseign mína og nú liggur mér á að finna aðra áður en peningarnir brenna upp.

 

Neyðarlög sett í dag

Niðurstaðan stormur í vatnsglasi?

Nú hafa ráðamenn þjóðarinnar og helstu peningamennirnir fundað stíft og niðurstaðan komin í ljós: Staðan er ekki eins slæm og í fyrstu var talið. 

En nú bíð ég spenntur eftir gengisskráningunni á morgun.  Hvað gerist næst?  Fer krónan að styrkjast aftur? Gengur krónan til baka? Fellur allt í sama fína gengið og fyrir 12 mánuðum þegar krónan var mjög sterk og stöðug? Eða heldur krónan áfram að falla eftir lögmáli Newtons?

Annars hef ég engar áhyggjur.  Á fjögurra ára fresti veljum við 63 einstaklinga sem eiga að hafa áhyggjur fyrir okkar hönd! Mér fannst Egill Helgason í Silfrinu góður í dag þegar hann hvessti augum á Ágúst Ólaf og Pjetur Blöndal og spurði mjög ákveðið hvort þeir bæru ekki ábyrgð á stöðunni.

Ekki þörf á aðgerðapakka

Skemmtileg mismæli

Á sunnudaginn var hitti ég í Gónhól á Eyrarbakka frænku mína Aldísi Hafsteinsdóttur sem þar var ásamt Lárusi manni sínum, Alberti yngsta barni þeirra og tveimur skiptimiðum frá Suður-Ameríku. Ja, ég segi bara bestu keðjur í Hveragerði.

900 byggingum slegið á frest

Það hlaut að vera!

Já, ég tók strax eftir þvíað Selfoss hafði færst nær Eyrarbakka þegar ég ók að Litlu-Sandvík um sex leytið þann 29. maí sl.  Palli frændi er alveg ótrúlega talnaglöggur - eins og margir Hlíðarmanna.

Selfoss færðist í skjálftanum

Ég er trúaður en ekki strangtrúaður!

"Samkvæmt Opinberunarbók Biblíunnar er talan 666 númer hinnar illu skepnu eða djöfulsins", segir í fréttinni.  En ég sem fæddur er í júní árið 1966 hlýt þá að bera númer þessarar illu skepnu eða djöfulsins.  Og ekki nóg með það, þrír síðustu stafir í kennitölu minni er 999 sem er 666 á hvolfi. -Ja nú vesnar í því! En sem betur fer er ég ekki strangtrúaður þannig að mér finnst þetta allt í lagi. Reyndar er ég bara mjög ánægður með kennitöluna mína.

Óánægð með kennitöluna 666