Vor í Árborg úti

Heiður sé þeim félögum Þóri og Andrési fyrir skipulagningu menningarhátíðarinnar Vors í Árborg. Vorið varð nokkuð langt að þessu sinni, heilir tíu dagar og tólf ef við tökum með þjófstart krónprinsparsins sem þann sjötta maí skoðaði kirkju og gamalt hús á Eyrarbakka og át hamborgara og franskar í bílskúr á Stokkseyri.

Eftirfarandi atburði og sýningar tók ég þátt í eða skoðaði:

Ég tók á móti krónprinsparinu danska við Húsið á Eyrarbakka þann 6. maí og sýndi þeim safnið.

Þann 8. maí fylgdist  ég með Árna Valdemarssyni vígja Gallerý Gónhól í frystihúsinu gamla á Eyrarbakka, þar opnaði Jón Ingi sýningu og í sama húsi opnaði Hallur Karl vinnustofu sína.

Þann 9. maí opnaði Byggðasafnið sýningu á gömlum millipilsum og Sjóminjasafnið sýningu á efni tengdu Eyrarbakka.

Laugardaginn 10. maí fylgdist ég með glímuflokki í garði Hússins á Eyrarbakka og fór á stórmarkað í frystihúsinu. Ég heilsaði upp á Regínu í Litlu Vesturbúðinni. Hlustaði á Lúðrasveit Selfossi við Sólvelli. Og á laugardagskvöldinu 10. maí fór ég um Eyrargötuna á Eyrarbakka, las á staura ljóð og annað efni um Bakkann, og kom við í Sjónarhóli þar sem Magnús Karel og Inga Lára voru að forsýna myndir í glugga af Eyrbekkingum í búðarglugga Laujabúðar.

Þriðjudaginn 13. maí bar ég 25 klappstóla í Sjóminjasafnið á Eyrarbakka og þar kl. 15 mátti heyra í Margréti Hallmundsdóttur fornleifafræðingi kynna fornleifaskráningu í Árborg. Það var setið í öllum 25 stólunum.

Fimmtudaginn 15. maí fórum við Gurra á opnun ljósmyndasýningar í Tryggvaskála, sýningar sem Gunnar Sigurgeirsson ljósmyndari á heiðurinn af.  Hann safnaði saman ljósmyndum teknum af lögregluþjónum á Selfossi og af flóðum á Selfossi.

Laugardaginn 17. maí fylgdist ég með ótrúlegum fjölda gamalla Selfossbíla renna framhjá mínu einbýlishúsi við Túngötuna á Eyrarbakka.

Og laugardaginn 17. maí fengum við Kristinn Valberg okkur pylsu og kók í boði Atlantsolíu á Selfossi.

Þannig að þessi veglega menningarhátíð fór ekki fram hjá mér. 

Góðir gestir á Eyrarbakka

Í gær komu góðir gestir á Eyrarbakka. Sjá heimasíður þeirra hér og hér. 

Ég er nú yfirleitt ekki vanur að blanda fjölskyldu minni né vinnu í bloggið mitt en hér geri ég smá undantekningu. Hér að neðan gefur að líta mig ásamt Kristni syni mínum í góðum hópi gesta í Assistentahúsinu. 

 

Litla-Sandvík

http://www.mbl.is/mm/frettir/innlent/2008/04/09/pall_lydsson_latinn/

Allt í sómanum í Árborg

Í gær fór ég bæði í sund og til rakara.  Í sund til að liðka mínar fætur og til rakarans til að snyrta minn haus.

Ekkert markvert bar til frásagnar í lauginni sem fréttnæmt þætti amk hvað varðar fréttina sem bloggað er um.

Á Rakarastofu Árborgar í Miðgarði var hinsvegar mikið rætt um þetta mál alltsaman og í því sambandi má þess geta að á stofunni voru einungis karlmenn sem tóku þátt í misjafnlega rismiklum umræðum um Svíann í sundlauginni í Laugarskarði. 

Eldri rakarasonurinn sagði frá óförum sínum er hann skrapp í sauna eitt sinn í útlöndum og allt í einu fylltist saunaklefinn af nöktum konum.  Og þetta var ekki kvennatími bætti hann við. Að endingu hrökklaðist hann úr klefanum enda hann sá eini sem var í sundfötum og stakk því skynjanlega í stúf við aðra gufubaðsiðkendur þar.

Og Lalli, sem beið eftir hárklippingu eins og ég, sagði frá mjólkurbílstjóra einum sem í rigningu einn dag tók erlendan kvenkyns puttafarþega á leið sinni um blómlegar sveitir Suðurlands. Og stúlkan tók allt í einu upp á því að þurrka fötin sín enda rennandi vot og varð því skjótt ber að ofan. Og hvað gerði Kiddi við þá óvæntu uppákomu? Jú, hann ók mjólkurbílnum hraðar.

Bannað að bera brjóstin í Hveró

Gettu enn enn og ennþá betur

Einu sinni enn er þessi vinsæla keppni á dagskrá sjónvarpsins.  Ég er sennilega einn af þeim örfáu sem halda því fram að þessa keppni hefði bara átt að halda einu sinni og aldrei, aldrei og aldrei aftur! Þ.e. vorið 1986.

MR í úrslit í Gettu betur

Síminn hf stendur sig illa

Frétt Magnúsar Hlyns Hreiðarssonar sjónvarpsfréttaritara RUV á Suðurlandi um lélegt gsm samband í Flóahreppi olli mér bæði kátínu og gremju í gær.  Kátínu vegna þess hversu snilldarlega fréttin var sett upp með Margréti sveitarstjóra á Þingborg að tala í gsm síma út um glugga til að ná sambandi - en jafnframt gremju vegna vonlausrar baráttu minnar á Eyrarbakka við sama vandamál.

Það vill svo til að skrifstofa mín er til húsa í  byggingu sem er mjög vel einangruð - í þeim tilgangi að halda hita og raka stöðugu í kringum þau verðmæti sem þar eru jafnframt varðveitt.  Þessvegna næst ekkert gsm samband hjá gsm-símtækjum sem skráðir eru hjá Símanum.  Hinsvegar eru símar hjá Voddafóni vel tengdir innandyra.  

Ég sendi kvörtun til Símans fyrir tæpum þremur árum, fékk svar fyrir tveimu árum og lofað úrbótum en ekkert hefur gerst. 

Þolinmæði mín mikla er hinsvegar alkunn.

Slæm tíðindi af Swayze

Já, því miður reyndist fótur vera fyrir slúðurfrétt National Enquirer sem var heimild DV.is í gær. Sjá færslu mína hér fyrir neðan.

Patrick Swayze með krabbamein

Er Patrick Swayze feigur?

Á síðu minnsta keppinautar mbl.is er frétt um ágætan Hollywood-leikara Partrick Swayze sem leikið hefur í fjölmörgum kvikmyndum en þó aðeins tveimur sem haldið hafa nafni hans á lofti og gert hann heimsfrægan.  Myndirnar eru Dirty Dancing sem ég sá á mínu öðru háskólaári, sýnd í Regnboganum og þótti mér feikna vel heppnuð, og hin stórkostlega og ógeðslega væmna Ghost sem ég hefi séð oftar en einu sinni. Þar lék hann aðalhlutverkið með Demi Moore og er þar þekktast hið ógleymanlega atriði þegar aðalpersónurnar elskast á heldur óvenjulegum stað, nefnilega við leirkersrennibekk. Í myndinni Ghost eiga líka eftirminnilega spretti Woopy Goldberg og hinn frábæri leikari Vincent Schiavelli (1948-2005) sem að jafnaði lék heldur ógæfusamar persónur í sínum myndum. Í Ghost lék hann draug - og undarlegt sem það er þá lék Schiavelli í síðustu mynd sinni rúmu ári eftir dauða sinn ef eitthvað er að marka þessa heimild.

Í Dirty Dancing segir Swayze setninguna "Nobody puts Baby in a corner". Heldur undarleg málsókn átti nýlega sér stað í Bandaríkjunum en þar í landi hafa ráðamenn hjá Lionsgate kvikmyndaframleiðandanum farið í mál við nokkra barnafataframleiðendur.  Ástæðan er sú að síðastnefndir framleiðendur hafa notað ófrjálsri hendi þessa þekktustu setningu þessarar bíómyndar sem jafnframt er talin í hópi þekktustu setningar í sögu kvikmyndanna.

En svo ég botni þennan pistil þá fjallar þessi sorglega frétt á DV um krabbamein sem hinn geðþekki leikari Patrick Swayze þjáist af og hefur því miður breiðst út um allan líkamann.  Segir fréttin að þessi leikari sem er 55 ára gamall eigi einungis fimm vikur eftir ólifaðar.  Fréttin er hér.

Góður vafrari lagður niður

Ég man ekki hvaða tegund af vafrara ég notaði vorið 1992 þegar ég kynntist netinu í Fjölbrautaskóla Suðurlands þar sem ég var bókavörður um þriggja mánaða skeið.  Ragnar Geir getur eflaust svarað því.  Tengt var við tölvu á Kópaskeri af öllum stöðum landsins.  Þar bjó eða býr maður sem var mikill frumkvöðull. Ragnar Geir getur líka upplýst meir um það.  

Haustið 1995 fékk vinnustaður minn í fyrsta sinn veftengingu og nýja Macintosh-tölvu.  þá var þessi bylgja að bresta á og netþjónafyrirtæki að spretta upp. Vefskoðunarforritið var Netscape sem ég notaði allt þar til stofnunin var PC-vædd upp úr 2002. Ég kunni betur við Netscape en Explorer.

Nú hefur Netscape verið lagður niður sennilega vegna yfirburðastöðu Explorer á heimsmörkuðum.

Netscape lagður niður

Hlaupársdagur

Hlaupársdagar eru merkilegir dagar.  Ég er reyndar búinn að gleyma hvað gerðist fyrir fjórum árum, eða átta árum, hvað þá tólf árum.

Í dag hefur svosem ekkert markvert gerst.  En eitt finnst mér þó gleðilegt við þennan dag. Það eru gullhamrar sem ég hef verið sleginn í tölvuskeytum frá ónefndum telpum á mínum aldri sem ég á ágæt samskipti við um þessar mundir. Dæmi:

Bara þetta; Lýður, þú ert FRÁBÆR!

og

Ég tek undir ... að Lýður þú ert frábær !

og

Einmitt!

Ég varð satt að segja blóðrauður í framan þegar ég las þetta hrós og frá einum kk til viðbótar kom svo þetta:

Tek undir gullhamra kvenþjóðarinnar til Lýðs.

Ég á eiginlega ekki svona hrós skilið.  Var bara sinna skyldum mínum á lokadegi ákveðins umsóknarfrests.  

Eigið góðan hlaupársdag!