Kraftmikill er þessi gleymdi foss - en er hann fallegur?

Hef vitað af fossi þessum alla mína tíð.  Í Sunnlenskum byggðum II. bindi er ágæt ljósmynd af honum.  Ljósmynd þessi er einkennismynd fyrir Villingaholtshrepp - sem fyrir tveimur árum varð hluti af Flóahreppi.  Ekki hefur verið mikil traffík um Urriðafoss og hans hefur sjaldan verið getið í ferðamannabæklingum.  Í Vegahandbókinni, útgáfu frá 2004 segir:  "Urriðafoss, bær við Þjórsá og samnefndur foss, fossinn lágur og breiður. Þar ætlaði fossafélagið Titan að reisa mikið raforkuver um 1930." Ekki er þar að finna ljósmynd af Urriðafossi.

Fossinn sem gleymdist

Kartöflur Guðmundar á Sandi

Já, enn eru til kartöflubændur á Eyrarbakka.  Þeir Guðmundur á Sandi og Böðvar frá Skúmsstaða-Norðurkoti halda uppi merkinu, en fáir vita að fyrir seinni heimsstyrjöld var Eyrarbakki Mekka íslensku kartöflunnar. Hvergi var betra að rækta kartöflur annarsstaðar en í hinum Eyrbeiska sandi. En þá kom hnúðormurinn og Þykkvibærinn náði yfirhöndinni.

Íslenskar kartöflur í verslanir

Mike Tyson er fjörutíu og tveggja ára í dag!

Já, aldurinn færist yfir og þrátt fyrir að hvergi sé grá hár að finna á kolli  Michaels Gerards Tysons ber sífellt minna á afrekum hans í hnefaleikum og við að eyrnamerkja andstæðinga sína. Öðruvísi en þegar þeir ærðust í sjónvarpinu þeir Bubbi og Ómar yfir afrekum afmælisbarnsins.

Svo er hún líka fjörutíu og tveggja ára í dag franska leikkonan Frorence Pernel, snotur í sjón en ekki ekki man ég eftir henni leikandi í bíómyndinni BLEU.  Þarf að skoða hana aftur. Sennilega sofnaði ég undir myndinni.

En hvað um það, - þetta eru afmælisbörn dagsins.

Halldór Gestsson kvaddur

Í dag liggur leið mín í Hrunakirkju til að kveðja gamlan æskufélaga Halldór Gestsson sem var vetrarmaður hjá pabba og afa þegar ég var lítill. Þessa grein skrifaði ég í Moggann og mun væntanlega birtast næstu daga.

Þegar ég var ungur héldu faðir minn Páll Lýðsson og afi Lýður Guðmundsson, sem ráku félagsbú í Litlu-Sandvík, vetrarmann til að þeir gætu betur sinnt hreppsstjórn, félagsmálum, kennslu og fræðistörfum.  Einn þeirra var Halldór Gestsson frá Syðra-Seli í Hreppum sem kvaddur er í dag. Halldór starfaði í Litlu-Sandvík öðru hvoru á 7. áratugnum og allt til 1971. Ég man eftir honum fjögurra eða fimm ára gamall og ég minnist enn ilmsins úr pípu Halldórs sem barst úr vetrarmannsherberginu sem löngu síðar varð bóka- og vinnuherbergi föður míns. 

Á þessum tíma hafði Halldór krafta í kögglum og segir sagan að hann hafi haft betur í sjómanni við þá Geira í Stóru-Sandvík og Dodda í Stekkum.  Ekki veit ég hvort það var satt en sterkur var Halldór því lítið mál var fyrir hann að jafnhatta mig hátt á loft og er til ágæt ljósmynd af því.  

Halldór bjó á Flúðum eftir að hann hætti að starfa sem farandverkamaður í þjónustu bænda. Ég hitti hann öðru hvoru að störfum í þágu Hrunamannahrepps. Meiri samskipti hafði ég við Halldór vegna sameiginlegs verkefnis hans og föður míns sem var ábúendatal Árnessýslu, langt og viðamikið skjal sem segir frá ábúendum á öllum jörðum Árnessýslu eins lengi og heimildir greina. Tölvubréf með nýjum “uppfærslum” og leiðréttingum bárust með reglulegu millibili til mín sem ég sá svo um að prenta út og koma upp í Litlu-Sandvík.  

Halldór Gestsson var nefnilega ötull fræðimaður og safnaði saman margvíslegum upplýsingum um samfélag sitt.  Hann var, ólíkt föður mínum, mikill tölvumaður og er ekki að efa að í tölvu Halldórs Gestssonar og á heimili hans má finna margvíslegar uppskriftir ættfræðibóka og handrita. Af hógværð sinni flíkaði hann ekki gögnum sínum né fræðiskrifum en  í fórum Halldórs finna merkar upplýsingar um sögu sunnlenskra sveita. Samskipti Halldórs og Páls föður míns  voru náin og farsæl eins og ábúendatalið ber með sér.  Það er leitt að þeir skuli báðir vera farnir úr þessari jarðvist – svona allt of snöggt á þessum vormánuðum 2008.     

Ég á einungis góðar minningar um Halldór Gestsson. Blessuð sé hans minning. Ég votta systkinunum samúð.

Lýður Pálsson

 

Svíagrýlan kveðin niður?!

Ég skal vera hreinskilinn:  Ég bjóst ekki við þessu. 

Til hamingju strákar! 

Góða ferð til Peking.

Handboltaliðið fer á ÓL í Kína

Brot af því besta í brotum

Enn um jarðskjálfann. Ein sýningardeildin í Assistentahúsinu heitir Brot af því besta.  Fimmtudaginn 29. maí kl. 15.45 fékk þessi sýning það heiti bókstaflega þar sem allir þeir sýningaskápar sem lausir voru á gólfi, þ.e. ekki festir á vegg ultu um koll.  Hér að neðan gefur að líta pínulítinn mun. Á efri myndinni eru ég og Kristinn sonur minn ásamt þremur öðrum gestum á þessari tilteknu sýningu þann 6. maí sl. Hin myndin var tekin skömmu eftir skjálftann þann 29. maí.  Glerið úr sýningaskápunum mölbrotið og fáir gripir úr postulíns og glerskápnum eru heilir og þarfnast forvörslu.

Tugir smáskjálfta á hverri klukkustund

Bókaflóðið í Litlu-Sandvík

Hér gefur að líta á bókaflóðið úr vinnuherbergi föður míns Páls Lýðssonar heitins í Litlu-Sandvík.  Þar bíður ærinn starfi við að raða bókum og öðru lauslegu.     

 

 

Snarpir eftirskjálftar í kvöld

Úff!

Jæja, nóg framundan við tiltektir!  Og fínu glerskáparnir í Assistentahúsinu fyrir bí.  Allt á rúi og stúi í þjónustuhúsi safnsins,  Húsið slapp vel, einnig Eggjaskúrinn og Sjóminjasafnið.  Heimilið mitt slapp vel og ekki ein einasta bók datt þar úr hillu. Í Litlu-Sandvík varð hinsvegar sannkallað bókaflóð!

Þessi skjálfti í dag var mun snarpari og aflmeiri en skjálftarnir árið 2000. 

Æðruleysi hefur verið mitt mottó síðustu vikna.  Við þennan skjálfta líka. Hér að neðan ágætismynd af skrifstofunni minni.

Skemmdir á safngripum í byggðasafni

Reykingar á Eyrarbakka

Þessi frétt rifjar upp 10 ára gamla veislu í Húsinu á Eyrarbakka þar sem heilt brunavarnakerfi var aftengt - til heiðurs danadrottningu.  Ekki var gert mikið mál út af því á sínum tíma.

Og í DV mátti nokkru síðar lesa ágæta grein sem fjallaði um reykingar á Eyrarbakka.

Danadrottning varð að fara út til að reykja

Í skýrum kolli Ögmundar ...

                                                               ... liggur lausn efnahagsvandans að mati mbl.is - ef eitthvað er að marka þessi  skilaboð sem forsíða mbl.is gaf fyrir stundu.

„Ríkisstjórnin í afneitun"