Umræður í heita pottinum

Ég skrapp í sund í dag.  Synti 200 metrana af gömlum vana. Fór svo í heita pottinn og hugðist taka þátt í þjóðmálaumræðunni.  Heiti potturinn var troðfullur af fólki. Ekki voru það Íslendingar.  Potturinn var fullur af Frökkum, nokkrum eldri en mér en mestmegnis ungt fólk um tvítugt, þ.e. franskur skólahópur og mér til mikillar ánægju að stórum meirihluta stúlkur í baðstrandarfatnaði.  Þannig að vel fór um mig og prófastinn sem einnig var í pottinum með hinum stóra franska hópi.  Og eins og rétt má geta þá varð mér hugsað til hinnar dásamlegu teiknimyndafígúru Línunnar sem Ríkissjónvarpið íslenska flutti um langt árabil landslýð til ánægjuauka og gleði. Og við munum öll að þar talaði Línan hraða frönsku eins og hinir ungu Frakkar í heita potti Sundhallar Selfoss í dag.

Það fór semsagt vel um mig og sjera Úlfar.

Geir Haarde, Stalín og Mugabe

Þessi vinnubrögð ríkisvaldsins eru ættuð úr fjármálaráðuneytinu frá þeim tíma er Geir Hilmar Haarde var þar ráðherra.  Í gagnasafni Moggans má sjá hér,  hér og svo aftur hér hvernig maður mér nokkuð skyldur og sagnfræðingur túlkaði þessar aðfarir ríkisvaldsins.  Aðförum Geirs Hilmars Haarde er þar líkt við aðfarir Stalíns kommúnistaleiðtoga í Sovjet og Roberts Mugabe forseta Zimbabwe þar sem landtökumenn óðu uppi fyrir nokkrum árum.

Skagfirðingar mótmæla túlkun þjóðlendulaganna

"Ný" samgöngutækni gerir bílinn brátt óþarfan

 Þessi frétt fór á fréttavefinn góða www.eyrarbakki.is á föstudaginn langa:

Í hádegismat á Rauða:

Þyrla lendir við Húsið 

Á föstudaginn langa varð uppi fótur og fit á Bakkanum þegar sást til þyrlu á sveimi yfir þorpinu. Að lokum hnitaði hún hringi við Húsið og lenti á Garðstúninu.

Þar var komin þyrlan TF-HHG frá Þyrluþjónustunni með flugmönnunum Halldóri Hreinssyni og Reyni Frey Péturssyni við stjórnvölinn og fjórum farþegum innanborðs.

 Voru hér á ferð fjórir erlendir ferðamenn sem voru að skoða sig um á Suðurlandi og höfðu m.a. komið við á Langjökli og á Geysi í Haukadal.

Tilgangur heimsóknarinnar til Eyrarbakka var að snæða hádegisverð í Rauða Húsinu og tók Ingi Þór Jónsson, vert í Rauða, á móti ferðalöngunum sem höfðu viðdvöl í u.þ.b. tvær klukkustundir.

Fyrir utan þessa skemmtilegu nýbreytni var mjög mikill gestagangur á Bakkanum í dag, margir sóttu söfnin í Húsinu og Sjóminjasafninu heim og aðrir nutu góðra veitinga í Rauða Húsinu.

Ásýnd Reykjavíkur breytist

Ásýnd Reykjavíkur mun heldur betur breytast með tilkomu nýrra háhýsa. Litla höfuðborgin fer að líkjast annarri stórborg.  "Reykjavík! Reykjavík!" Eða "First we take Reykjavík city".

Sænskir arkítektar unnu samkeppni um nýjar höfuðstöðvar Glitnis

Essómerkið á íslensk minjasöfn?

Því miður hafa íslenskir safnamenn verið of ragir við að eiga við samtímann.  Ég vona þó að eitthvað af þessu Essódóti eigi eftir að fara inn í geymslur og etv. sýningar minjasafna í framtíðinni - ef ekki strax.  Kannski bara best að skreppa að útibúi Olíufélagsins við Ölfusá nú í vikunni og sníkja þar eyðublöð, peysur og allskonar dót með hinu  sígilda og fallega lógó Essó. Og þó - þetta er alþjóðlegt fyrirbæri. Eða hvað finnst ykkur? Þá ætti kannski að safna Essómerki þar sem "Olíufélagið hf" fylgdi með?

Esso-merkið kostar fimmtíu milljónir á ári

Árangur áfram með framsókn

Þennan flokk hef ég stutt frá því ég fór að fylgjast með stjórnmálum - og mun styðja árangur áfram.  Þessi flokkur er einhvernveginn svo laus við alla öfga, fordóma og forsjárhyggju.  Hafa málefni fjölskyldunnar í öndvegi og leggja áherslu á að hjól atvinnulífsins snúist áfram.  Góðærið lengi lifi! 

Framsóknarmenn boða áframhaldandi uppbyggingu atvinnulífsins

Reynt að brjótast inn í fangelsi?

Ekki er að spyrja að vinsældum þessa merka staðar, Fælu í landi Háeyrar. Þar skortir víst ekki hráefnið.  Einhverjir hafa lagt á sig að klippa á girðingarnar tvær til að komast inn. 

Klippt á girðingar við Litla-Hraun

Hækkum launin!

Af hverju hækka yfirvöld ekki launin í takt við menntun, álag og ábyrgð?

Það er vitað mál að fjöldinn allur af hjúkrunarfræðingum hefur hætt störfum í heilbrigðisþjónustunni undanfarin ár sökum lágra launa miðað við þá ábyrgð sem þeim er falin á heilbrigðistofnunum. Með því að hækka launin væri hægt að fá þennan hóp aftur til starfa.

Hver er tilgangurinn með að mennta nýja hjúkrunarfræðinga sem svo kannski fást ekki til að koma til starfa sökum lágra launa?

Einnig hafa margir sjúkraliðar flúið úr starfinu og þá gjarnan í aukna menntun og hærri laun. Afleiðingin:  Skortur á sjúkraliðum.

Hækkum launin!

Skortur á hjúkrunarfræðingum og sjúkraliðum ógnar öryggi sjúklinga

Séra Kolbeinn allur

Það var ekki ætlun mín þegar ég opnaði þetta blogg að það yrði vettvangur minningargreina, stuttra og langra um nýlátna vini, ættingja og kunningja. En svo undarlegt sem það er þá hafa einir sex einstaklingar sem ég þekkti mjög vel fallið frá undanfarna vikur.  Það eru þau Þorvarður í Stekkum, Sveinn í Bræðratungu, Ingólfur Guðnason mágur móður minnar,  Greipur Ketilsson, Jónína Vigdís Schram vinkona mín í gegnum Húsið.  Á blogginu hef ég skrifað um þau sum.  Og nú í Fréttablaðinu í dag las ég tilkynningu um lát séra Kolbeins Þorleifssonar frá Háeyri á Eyrarbakka.  Hann þekkti ég vel af vettvangi fræðagrúsks.  Kom oft til mín á vinnustaðinn og oft sat hann fræðslufundi hjá Sögufélagi Árnesinga.

En svona er víst lífsins gangur. 

 

Sól stattu kyrr

Sól stattu kyrr! Þótt kalli þig sær

til hvílu – ég elska þig heitar.

Þú blindar mín augu, en þú ert mér svo kær

og eins hvort þú skín, eða bæn minni neitar.

Ég sæki þér nær, þótt þú færir þig fjær

þótt þú fallir í djúpið mitt hjarta til geislanna leitar!

(Sig.Sig.Arnarvatni)

Kvæði þetta var flutt í jarðaför vinkonu minnar Jónínu Vigdísar Schram í gær,  - við nýsamið lag eftir tengdason hennar Valgeir Guðjónsson.

Blessuð sé minning Vigdísar - sem reyndist mér hinn mesti fræðasjór um aldarandann í Húsinu á Eyrarbakka fyrir öld síðan.  Ég tel mig lánsaman að hafa fengið að kynnast henni.