Kosið í baðstofu

Ljósmynd þessi er tekin 20. nóvember 1993 í baðstofunni í Litlu-Sandvík.  Lengi vel fóru allar kosningar í Sandvíkurhreppnum fram í Litlu-Sandvík á heimili hreppstjórans og oddvitans. Þennan dag voru sameiningarkosningar og átti að fækka sveitarfélögum. Hér var kosið um þann möguleika að sameinast 6 öðrum sveitarfélögum í Flóanum. Það var að sjálfsögðu kolfellt eins og allsstaðar annarsstaðar á landinu. Ljósmyndin sem ég tók sýnir kjörstjórn Sandvíkurhrepps, þau Jónu á Dísarstöðum, Smára í Stóru-Sandvík og Dodda í Stekkum.  Einnig er á myndinni hreppstjórinn faðir minn Páll Lýðsson. Hann sá um utankjörstaðaatkvæðagreiðslu ef villuráfandi sauði bar að garði.  Hér hefur tvo slíka borið að og er annar þeirra frá Hellu en hinn úr Borgarfirði. Þeir komu að austan og voru á leið til Reykjavíkur. Borgfirðingurinn  sparaði sér þá miklu fyrirhöfn, að keyra í Borgarnes til að kjósa, með því að kjósa utankjörstaðar hjá hreppstjóranum í Sandvík.. Hreppstjórinn er eflaust að gefa þessum tveimur "spjátrungum" heilræði um lífið og tilveruna. Það hefur væntanlega farið inn um annað eyrað og út um hitt.  Sá sem býr sig undir að kjósa er heilbrigðisráðherra.

 

Athugasemdir

[Óskar Helgi Helgason (IP-tala skráð) 11.1.2009 kl. 02:29]

Heill og sæll; Lýður, og velkominn, í spjallvinahóp minn !

Þakka þér; skemmtilega frásögu, sem og myndina, úr stjórnsýslu hins forna Sandvíkurhrepps.

Sannarlega; kvöddu þeir, fullfljótt, þeir Þorvarður heitinn, líka sem faðir þinn, á sínum tíma, en eigi er við örlögunum séð, Lýður minn.

Með beztu kveðjum; úr Hveragerðis- og Kotstrandar sóknum /

Óskar Helgi Helgason

[Lýður Pálsson, 11.1.2009 kl. 02:42]

Sæll Óskar Helgi.

Þakka þér kærlega fyrir innlitið á síðu mína, sem og hlý orð um gengna tvo.

Lýður.

[Ásgeir Jóhann Bragason, 13.1.2009 kl. 17:54]

Gaman að þessu vínur