Sagan endurtekur sig

Ég skil ekkert í þessu havaríi yfir Vilhjálmi Þorn.  Hann hefur áratugareynslu í pólitík og var í heil tólf ár formaður Sambands ísl sveitarfélaga sem sýnir hversu mikils trausts hann nýtur meðal  sveitastjórnarmanna.  Hann átti fyllilega skilið að verða borgarstjóri 2006 og stóð sig alla tíð afskaplega vel í því starfi. Og hann kemur vonandi aftur.

það sem er að fara með glæstan stjórnmálaferil Vilhjálms er að mínu mati hið mikla offors og ákafi viðskiptajöfra að komast í samstarf við OR-gullkálfinn.   Sömuleiðis hafa íslenskir fjölmiðlar þá áráttu að leggja einstaklinga í einelti  og herja á einstaklinga sem gefa á sér höggstað og standa í varnarbaráttu á fleiri en einum stað.  Að blanda saman opinberum rekstri og einkarekstri getur verið vandasamt og greinilegt að ýmsir stóðu beggja megin samningaborðsins í haust - en ekki þó Villi - en vinir hans ýmsir og nánir samstarfsmenn því miður.

Eru allir búnir að gleyma afsögn Guðmundar Árna Stefánssonar um 1990? Herferð fjölmiðla sem undir öruggri bakstjórn formanns flokks sem ekki er lengur til réðust af miklu oforsi að Guðmundi Árna Stefánssyni ráðherra? Vegna mála sem komu hans ferli í ráðherrastól ekkert við?  Þá var sömu aðferðum beitt,  fjaðrir urðu að hænum og svo framvegis, efnisatriði meintra spillingaratriða endurtekin og endurtekin, GÁS sagður í pólitískri veikri stöðu og að lokum sagði Guðmundur Árni af sér.  Stöð 2 gekk harðast í orrahríðinni gegn ráðherranum, ráðherrann í óvægnum yfirheyrslum og Jón Baldvin tónaði undir á milli.  Mágur Guðmundar Árna, Heimir Karlsson,  hætti störfum á Stöð 2 í kjölfarið. Sagði upp.  Nú um þessar mundir ganga fjölmiðlar með bláa ríkisfjölmiðilinn í farabroddi  hart gagnvart Vilhjálmi þannig að félagar hans í borgarstjórninni neyðast til að ganga út um bakdyr og láta sem Villi sé einn í heiminum.  Og ein skeleggasta fjölmiðlakona landsins, dóttir Vilhjálms, segir upp í Kastljósi. Sagan endurtekur sig. 

Ef ég er orðinn á þreyttur á einhverju ástandi þá er það hið lága plan íslenskra fjölmiðla. Að gera mistök í hólmgöngu getur þýtt dauða.  Að mismæla sig í Kastljósi getur líka þýtt endalok stjórnmálaferils.  Einhvernveginn finnst mér aukaatriðin vera orðin að aðalatriðum í þessum höfuðborgarstjórnarfarsa. Aðalatriðið er það að engin stjórnmálahreyfing fékk hreinan meirihluta í borgarstjórnarkosningunum 2006.  Sömuleiðis árið 1978 fékk engin stjórnmálahreyfing hreinan meirihluta í borgarstjórnarkosningunum.   Í hönd fóru fjögur glundroðaár - eins og þessi fjögur ár eiga eftir að verða  allt til vorsins 2010. Sagan endurtekur sig.

Undir Vilhjálmi komið hver verður næsti borgarstjóri

Athugasemdir

[Eiríkur Harðarson, 13.2.2008 kl. 21:10]

Eitthvað er þetta nú djúpt skítafen sem fjölmiðlar virðast vera löngu löngu fallnir ofaní, það alveg magnað hvað MARGIR lifa orðið einsog stefnulaus fífl.

[Lýður Pálsson, 13.2.2008 kl. 21:37]

"misheppnaða tilraun til að ljúga" já kannski, nei segir hann sjálfur, en hann var jú í þriðjugráðu yfirheyrslu hjá Sigmari flokksfélaga sínum - ekki satt!

[Arafat í sparifötunum, 13.2.2008 kl. 22:13]

Ég nota nú bata málsháttinn sem Davíð Oddson  bjó til um árið ,, ef þú er kominn ofani holu,hættu þá að grafa,,

Kall greyið er kominn ofaní holu sem hann veit ekki hvernig hann á að komast uppúr og hann heldur áfram að grafa .... Hann ætti kanski að íhuga frama í mínu fagi....

[Lýður Pálsson, 13.2.2008 kl. 23:00]

Eru fornleifafræðingar líka í tómu tjóni?