Halldór Gestsson kvaddur

Í dag liggur leið mín í Hrunakirkju til að kveðja gamlan æskufélaga Halldór Gestsson sem var vetrarmaður hjá pabba og afa þegar ég var lítill. Þessa grein skrifaði ég í Moggann og mun væntanlega birtast næstu daga.

Þegar ég var ungur héldu faðir minn Páll Lýðsson og afi Lýður Guðmundsson, sem ráku félagsbú í Litlu-Sandvík, vetrarmann til að þeir gætu betur sinnt hreppsstjórn, félagsmálum, kennslu og fræðistörfum.  Einn þeirra var Halldór Gestsson frá Syðra-Seli í Hreppum sem kvaddur er í dag. Halldór starfaði í Litlu-Sandvík öðru hvoru á 7. áratugnum og allt til 1971. Ég man eftir honum fjögurra eða fimm ára gamall og ég minnist enn ilmsins úr pípu Halldórs sem barst úr vetrarmannsherberginu sem löngu síðar varð bóka- og vinnuherbergi föður míns. 

Á þessum tíma hafði Halldór krafta í kögglum og segir sagan að hann hafi haft betur í sjómanni við þá Geira í Stóru-Sandvík og Dodda í Stekkum.  Ekki veit ég hvort það var satt en sterkur var Halldór því lítið mál var fyrir hann að jafnhatta mig hátt á loft og er til ágæt ljósmynd af því.  

Halldór bjó á Flúðum eftir að hann hætti að starfa sem farandverkamaður í þjónustu bænda. Ég hitti hann öðru hvoru að störfum í þágu Hrunamannahrepps. Meiri samskipti hafði ég við Halldór vegna sameiginlegs verkefnis hans og föður míns sem var ábúendatal Árnessýslu, langt og viðamikið skjal sem segir frá ábúendum á öllum jörðum Árnessýslu eins lengi og heimildir greina. Tölvubréf með nýjum “uppfærslum” og leiðréttingum bárust með reglulegu millibili til mín sem ég sá svo um að prenta út og koma upp í Litlu-Sandvík.  

Halldór Gestsson var nefnilega ötull fræðimaður og safnaði saman margvíslegum upplýsingum um samfélag sitt.  Hann var, ólíkt föður mínum, mikill tölvumaður og er ekki að efa að í tölvu Halldórs Gestssonar og á heimili hans má finna margvíslegar uppskriftir ættfræðibóka og handrita. Af hógværð sinni flíkaði hann ekki gögnum sínum né fræðiskrifum en  í fórum Halldórs finna merkar upplýsingar um sögu sunnlenskra sveita. Samskipti Halldórs og Páls föður míns  voru náin og farsæl eins og ábúendatalið ber með sér.  Það er leitt að þeir skuli báðir vera farnir úr þessari jarðvist – svona allt of snöggt á þessum vormánuðum 2008.     

Ég á einungis góðar minningar um Halldór Gestsson. Blessuð sé hans minning. Ég votta systkinunum samúð.

Lýður Pálsson

 

Athugasemdir

[IHJ (IP-tala skráð) 19.6.2008 kl. 21:32]

Bestu þakkir Lýður fyrir mjög góð og fræðandi eftirmæli þín um Halldór. Ég var bundin af löngu ákveðinni norðurferð svo ég var svolítið stúrinn yfir því að fá ekki mína grein birta jarðarfarardaginn og skrifaði hana beinlínis vegna þess að ég komst. Svo komu margar greinar í seinni lotu og þetta jafnaði sig. Góðar stundir Ingi Heiðmar.

PS. Ég fer með frúnni í gestamóttöku á Hótel Jórvík á Þórshöfn á Langanesi tvær fyrstu vikurnar í júlí. IHJ