Hún á afmæli í dag!

Þessi mynd var tekin í túninu á Þorfinnsstöðum í Vesturhópi á 5. áratug síðustu aldar og sýnir heimasætuna yngstu á bænum með fjárhundinum. 

Heimasætan heitir Elínborg Guðmundsdóttir og er móðir mín.  Hún fæddist á þessum bæ fyrir norðan þann 28. maí 1937 og er því óhjákvæmilega, hvort sem henni líkar það betur eða verr, sjötug í dag. 

Mikil umskipti urðu í hennar lífi er hún kynntist við Menntaskólann að Laugarvatni strák úr Flóanum nefnilega honum föður mínum.  Þau hafa í yfir  fjörutíu ár verið bændur í Litlu-Sandvík.

 

Það eru ekki margir sem vita það að mamma er ágætur ljósmyndari.  Lesendum þessa bloggs ætla ég að leyfa að njóta þessarar myndar sem tekin var við heyhirðingu á Kotferjutúni sumarið 1981.

Mynd þessi sýnir hinn algenga baggaheyskap sem tíðkaðist í íslenskum sveitum frá ca. 1975 til 1990 er rúlluheyskapur varð hið algengasta heyskaparform hérlendis. Ljósmyndin sýnir svo ekki sé um villst að Páll Lýðsson er spretthlaupari þegar svo ber undir.  Hér hleypur hann ásamt tveimur kaupamönnum Bjarka Sverrissyni (t.vinstri), núverandi starfsmanns Reiknistofu bankanna, og Kolbeini Gunnarssyni, sem nam rafmagnsverkfræði. Og hirðingin gekk fljótt og vel.  Undir stýri Nýja-Massa er Sigurjón Örn Ólason, sem nú er flugvélavirki. Á vagninum glittir í systur mína Aldísi Pálsdóttur.  

Athugasemdir

[Baldur Kristjánsson, 29.5.2007 kl. 00:40]

Þetta er glæsilegt!  Ert þú (Lýður) á ljómyndavélinni? eða eru þeir Bjarki og Páll spretthlaupari að hlaupa á efir þér?  Hvers vegna þá?  kv.  B.

[Lýður Pálsson, 29.5.2007 kl. 09:01]

Greinlegt er að þú hefur ekki kynnst baggaheyskap Baldur! Mamma tók myndina. Þegar ljósmyndin var tekin var ég í öðrum traktor sem tengd var heybindivél og ég því ekki langt frá vettvangi þessarar ljósmyndar.  Verið er að tína upp heybagga sem liggja í röð. Svo virðist sem slægjan hafi ekki verið mikil þetta sumarið sem kom eftir kalvetur. Því var langt á milli baggana sem gerði  það að verkum að hægt var að láta heyvagninn aka hratt eftir heybaggaröðinni. 

[Hafsteinn Viðar Ásgeirsson, 30.5.2007 kl. 22:01]

Bið að heilsa gamla kennaranum mínum. Hann er ekki bara liðtækur spretthlaupari þegar svo ber undir hann Páll...