Smánudd á Skólavörðustígnum

Það telst ekki frétt þó bakkað sé á annan bíl, vegg, grindverk, burðarsúlu  eða ljósastaur. Það að bakka á tré telst varla frétt. Eftir atvikum er það frétt ef bakkað er á fólk.

En að bakka bílnum svona langt upp eftir trénu er eiginlega frétt.  Með reglulegu millibili berast fréttir af óhöppum fólks sem bakkar ýmist út  í skurð, oní vötn og skelfilegar geta fréttirnar orðið ef bílum er bakkað ofan í hafnir.

Ég hef eins og allir normal bílstjórar einhverntímann gert mig sekan um að sýna aðgæsluleysi við að bakka með tilheyrandi smávægilegu véseni - án þess að það yrði að frétt.  

Þessu óhappi á Skólavörðustígnum skal taka létt og vonandi að bílstjórinn og farþegi hans beri ekki sálarlegan skaða af þeirri miklu athygli sem þetta trjáklifur olli.

Eitt sinn seldi ég lítinn bíl til ungmennis. Tveimur vikum síðar barst hann í fréttirnar þegar hann lenti í nuddi við stærsta kranabílinn á Selfossi,  "Litli og stóri í árekstri" var fyrirsögnin.

Þúsund sinnum frekar vil ég svona fréttir úr umferðinni en fréttir af alvarlegum bílslysum.

Bakkað yfir tré á Skólavörðustíg

Athugasemdir

[Sædís Ósk Harðardóttir, 10.3.2007 kl. 23:51]

Þetta er nú samt svoldið vel gert  Ég lenti einu sinni í því að bakka út úr stæði og sá engan bíl fyrir aftan mig en einn bíll (mágs míns)var hinum meginn í botlanganum og ég náði að strauja alla hliðina á honum og mágur minn stóð og horfði á mig og ætlaði ekki að trúa sínum eigin augum Svona getur þetta verið

kv. Sædís

[Helgi Jónsson, 11.3.2007 kl. 18:38]

Þetta minnir mig á það sem kom fyrir dóttur mína sl aðfangadag. Hún hafði lagt bílnum fyrir utan hús hér á Selfossi við innkeyrsluna. Stuttu síðar bakkaði kona stórum pikup bíl út úr innkeyrslunni og bakkaði svo snilldarlega utan í bílinn okkar að hún náði að klippa framnúmerið af honum án þess að skemma neitt annað en lakkið og númerspjaldið. hennar bíll var aftur á móti skemmdur frá stuðara og fram á miðja afturhurð.